Дополнителната заменичка министерка Невенка Стаменковска Стојковски, немајќи докази за да ги побие објавените бројки во Извештајот на вработени во јавниот сектор за 2019-та година го критикува временскиот период на кој се однесува Извештајот. Имено, согласно Законот за вработени во јавен сектор, донесен за време на ДПМНЕ, Извештајот се објавува „најдоцна до крајот на првото тримесечје во тековната година, за претходната календарска година”.
Тоа го истакнува Министерството за информатичко општество и администрација (МИОА) во реакција на денешната изјава на Стаменковска Стојковски, и потенцира дека Извештајот објавен вчера, на овој начин се објавува од 2016.та година и временската рамка никогаш не била спорна.
Според МИОА, Извештајот покажува зголемување на бројот на вработени за 832 лица, односно за 0,6 проценти, споредено со 2018-та година. Бројка, што ДПМНЕ не може да ја прифати затоа што не одговара на нивните лажни проекции и дезинформации за илјадници нови вработени, кои изминатиот период ги пласираа во јавноста, стои во реакцијата.
ДПМНЕ, дополнуваат, продолжува да шпекулира и да презентира селективни информации, но кога од другата страна се соочуваат со анализи и извештаи кои се резултат на законски пропишани правила, единствено што им преостанува се хаотични тврдења. Дополнително, забораваат дека има вработени кои го напуштаат јавниот сектор и апсолутните бројки мора да бидат резултат на анализа и на новите вработени, но и на лицата кои се пензионираат или доброволно заминуваат во приватниот сектор, велат од МИОА.
Претходно Стаменковска Стојковски изјави дека министерот Дамјан Манчевски со објавата на Извештајот официјално го потврдил она што се обидувал да го сокрие, односно дека под водство на СДСМ државата достигна рекорден број на вработени во јавната администрација во својата историја.