Десничарската партија Фидес која во Унгарија во моментов е на власт, врши притисок врз законодавството за ставање крај на законското признавање на транс-лицата, така што полот би се дефинирал врз основа на „пол при раѓање“ и со тоа ќе им оневозможи на луѓето легално да го променат својот пол, пишува Гардијан.
Транс активистите велат дека овој закон ќе ја зголеми дискриминацијата и нетолеранцијата кон транс лицата. Многумина од нив ќе се обидат да ја напуштат земјата, додека оние што ја немаат таа шанса ќе се соочат со секојдневни понижувања.
Иако вниманието во моментов е насочено кон пандемијата на корона вирус, Бернадет Шел, независна пратеничка се спротивстави на законот и го опиша како „зло“ и „чекор назад во времето“. За време на сослушувањето во судскиот комитет на парламентот, таа се обиде да прочита писмо од транс луѓе во кое се објаснува колку е штетен законот за нив, но беше прекината од претседателот на комисијата, кој го опиша писмото како „нерелевантно“.
Шел, исто така, го критикуваше моментот во кој овој нацрт-закон се дискутира, со оглед на тоа дека земјата, како и сите во светот, се соочува со пандемијата од Ковид-19.
„Се соочуваме со пандемија и сите ние треба да се фокусираме на две работи: здравствените проблеми и да им овозможиме финансиска помош на лицата за да ја обезбедат својата благосостојба. Она што се случува во Унгарија е скандалозно“ вели таа.
Набљудувачите велат дека неговото усвојување преку комисиите потврдува дека владата напредува во своите намери, иако сѐ уште не е јасно кога нацрт-законот ќе биде ставен на гласање.
Во Македонија, ова прашање се уште стои под знак прашалник. Иницијативата за заштита и унапредување на правата на трансродовите лица во Република Северна Македонија – Трансформа, апелираа до Управата за водење на матични книги, како институција надлежна за промена на полот во личните документи да реагира по нивните барања./МЕТА/
