Четириесет и девет крвни единици беа собрани денеска во крводарителска акција во Кавадарци. Со цел превентивна заштита од коронавирус, согласно на препораките од надлежните, сите крводарители носеа заштитна опрема, а им беше мерена и температура.
Акцијата се реализираше во Домот на културата ,,Иван Мазов-Климе“, а во организација на Црвен крст Кавадарци и Институтот за трансфузиона медицина од Скопје.
-Кавадарчани уште еднаш ја покажаа својата голема хуманост и даруваа масовно од својата драгоцена течност, која некому ќе спаси живот. Годишниот план за крводарување за двете општини Кавадарци и Росоман секоја година изнесува 1184 единици крв, а минатата 2019 година дарувани беа над 2000 крвни единици, така што дарителите на крв од Тиквешијата се во редот на најуспешните во државата, нагласи Димитар Каракулев, претседател на кавадаречкиот Црвен крст.
Тој упати благодарност до сите крводарители и до Домот на културата за отстапениот простор.
