Директорот на Бирото за јавна безбедност при МВР, Сашо Тасевски во рамки на своите редовни активности денеска го посетил Одделението за внатрешни работи Прилеп, каде што имал работна средба со раководството на оваа организациона единица на која присуствуваа и двајцата началници од СВР Битола, јавуваат од МВР.
На средбата првиот човек на БЈБ бил информиран за актуелната безбедносна состојба на подрачјето на надлежност на ОВР Прилеп, а особен акцент бил ставен на подготовките на полицијата во пресрет на претстојните парламентарни избори и нивно безбедно одвивање.
Притоа, директорот Тасевски нагласил дека сите полициски службеници треба да постапуваат максимално професионално и согласно законските надлежности и обврски, укажувајќи дека е неопходно за сите евентуални незаконитости или нарушувања на изборниот процес да има ефикасна и брза разрешница, особено во поглед на кривичните дела. Според Тасевски потребно е бескомпромисно, неселективно и законито постапување а се со цел изборите да минат во најдобар можен ред.
По однос на безбедносната состојба директорот Тасевски беше информиран дека таа е мирна и стабилна, и дека интензивно се работи на расчистување на инцидентот во кој што беше фрлен молотов коктел во дворот на семејната куќа на командирот на ПС Прилеп, односно на откривање на сторителите, а денес до ОЈО Прилеп е поднесена и кривична пријава против едно лице по член 144, став 3 од КЗ на РСМ, за упатување закани по социјалните мрежи кон командирот на ПС Прилеп, информираат од МВР.
Ј. Ѓ.
