Според првичните резултати од парламентарните избори забележителна е победата на СДСМ во голем број општини. Нивната победа е изразена во општините со доминантни македонски гласачи. Ова е потврда дека и Македонците се определиле за понудата на СДСМ која значи европска, демократска и просперитетна иднина за државата.
Во скопската општина Центар СДСМ има водство пред ВМРО ДПМНЕ од 4 400 гласа, во Карпош 2 800, во Куманова предноста е 3 500 гласа, Крива Паланка со 2 500, во Битола СДСМ води со над 1 000 гласа, Струмица со 3 700. Предност има и во Крушево, Кочани, Берово, Радовиш, Валандово, Богданци и уште многу други општини. Покрај овие кои се со доминантно македонско население, СДСМ оствари победа пред ВМРО ДПМНЕ и во мултиетнички општини, во Тетово разликата е 2 000 гласа, во Гостивар 750, Теарце 1 000, Боговиње 1 500, Врапчиште 1 200.
Овие резултати потврдуваат дека предизборната коалиција со БЕСА е валоризирана затоа што СДСМ покажа на дело дека се залага за мултиетничка држава со почитување на правата на сите граѓани. Со овие остварени резултати СДСМ има најголем коалиционен капацитет, додека ВМРО-ДПМНЕ е во моментов на страна и повеќе соочена со фактот дека ќе мора да се реформира или ќе се соочи со закана за распад на партиската структура.
Извесно е дека Зоран Заев е новиот мандатар и дека тој прв ќе има шанса да состави владино мнозинство. Покрај поедини општини, генерално СДСМ победи во пет изборни единици, а со мала разлика загуби од ВМРО ДПМНЕ во третата изборна единица, но таму има шанси и двете партии да имаат по 10 пратеници, што значи во бројот на мандати да се изедначени, со мала предност на ВМРО ДПМНЕ во однос на бројот на гласови.
Во останатите изборни единици СДСМ однесе победа и практично таму ја направи предноста од неколку пратеници, дали ќе бидат два или три допрва ќе се знае откако ДИК ќе соопшти официјални резултати. СДСМ има поголема доверба во првата, втората, четвртата, петтата и шестата изборна единица. Ако се следат резултатите според изборни единици тогаш е јасно дека за СДСМ гласале гласачи од сите етнички заедници, каква што и беше коалицијата „Можеме“. Се потврди дека граѓаните од сите региони сакаат опција со понуда и со просперитетна програма. Ова е доказ дека граѓаните препознале визија во СДСМ и дека поголем дел од нив ги поддржуваат политиките за евроитеграции, но и плановите за зајакнување на економијата.
Од преброени гласови од 2.277 гласачки места од вкупно 3.480 гласачки места, Коалицијата предводена од СДСМ „Можеме“ води со освоени 36,78 отсто од гласовите пред Коалицијата предводена од ВМРО-ДПМНЕ со 35,75 отсто, покажуваат првичните податоци на ДИК. За Демократската унија за интеграција (ДУИ) гласале 10, 31 отсто, за Алијанса на Албанците и Алтернатива 8,13, за Левица 4,16, за Интегра 1,38, за Демократската партија на Албанците (ДПА) 1,33, а другите партии и коалиции учесници на изборите имаат под 0,4 отсто.
Д. Е.
