Заклучно вториот квартал од 2020 јавниот долг изнесува 59,5 отсто, додека државниот долг 50,7 проценти, соопшти Министерството за финансии.
Покачувањето на јавниот и државниот долг во вториот квартал, како што посочуваат оттаму, се должат пред се на повлекувањата на средствата преку еврообврзницата и заемот од Меѓународниот монетарен фонд, со цел обезбедување на ликвидност во време на КОВИД-19 кризата, обезбедување на средства за реализација на антикризните мерки и непречено извршување на буџетот и покрај кризата, односно покривање на зголемениот дефицит поради падот на приходите како резултат на КОВИД кризата.
– Jавниот долг, кој ги вклучува државниот, гарантираниот и негарантираниот долг заклучно второто тримесечје од 2020 изнесува 59,5 проценти од БДП, што споредено со претходното тримесечје претставува зголемување за 8,8 процентни поени. Државниот долг заклучно второто тримесечје е 50,7 отсто од БДП, што споредено со претходното тримесечје повеќе за 8,9 процентни поени, информираат од Министерството.
На промените на јавниот и на државниот долг, наведуваат, влијае повлекување на средства од склучени кредитни аранжмани со странски кредитори за вториот квартал од 2020 година во износ од 928,7 милиони евра, од кои 909,4 милиони евра за кредити на општа влада – 700 милиони евра за издадената Еврообврзница и 176,5 милиони евра од кредит од ММФ за Проектот за финансиска поддршка од инструментот за брзо финансирање за време на вонредна состојба, како и 19,3 милиони евра за заеми на јавните претпријатија. Има и повлекување по основ на држвни хартии од вредност во износ од 127,7 милиони евра.
– Во овој период освен повлекувања, имаше и отплати кои влијаеа на висината на јавниот и на државниот долг, како отплатата на рата за обврзница за денационализација која доспеа на 1 јуни 2020 година во износ од 7,98 милиони евра и отплата на обврски по основ на главнина од претходно земени заеми надворешен долг за вториот квартал од 2020 година изнесува 60,4 милиони евра, од кои отплата на главнина на општа влада во износ од 38,01 милиони евра и отплата на долг на јавни претпријатија во износ од 22,39 милиони евра, се вели во соопштението.
Проекциите за до крајот на годината се дека јавниот долг ќе се задржи на 59,6 посто од БДП, додека државниот ќе се намали на 49,6 отсто од БДП.
– До крајот на годината, поголеми повлекувања кои се очекуваат се првата транша од Заемот за макрофинансиска помош од Европската комисија во износ од 80 милиони евра, додека поголема отплата до крајот на годината е отплатата на Еврообврзницата земена во 2015 година во износ од 178,330,000 евра која доспева на 01 декемри 2020, понатаму главнина за заемот од Дојче банка во износ од 13,5 милиони евта која доспева на 10 декември и краткорочниот заем од домашни комерцијални банки во износ од 132,5 милиони евра кој доспева исто така во декември, се наведува во соопштението.
