Општина Демир Хисар со поддршка од Европска Унија го реализира проектот „Откривање на скриените атракции“ во рамките на ИПА Прекуграничната програма меѓу С.Македонија и Албанија.
Заедно со Демир Хисар, општина Клос од Албанија и невладините организации Арт Поинт Гумно од с.Слоештица и ФЛАГ од Тирана ќе развијат туристички патувања исполнети со локални искуства како планинарење, часови за готвење, офф роад авантури, изработка на домашни ракотворби, собирање на лековити билки и други автентични доживувања заедно со локалното население.
“Во рамките на проектот „Откривање на скриените атракции“ село Слоештица прераснува во туристичка атракција пред сѐ заради природните убавини, валавиците и планинарските патеки во непосредна близина кои исто така ќе се уредат и обележат. Ќе биде уреден и видиковец и неколку места за одмор и рекреација околу селото. Вредноста на овие инфраструктурни зафати изнесува 150.000 евра додека севкупната поддршка од ЕУ за партнерите од двете земји е 485.000 евра, истакна градоначалникот на Општина Демир Хисар, Марјанче Стојановски.
Во село Слоештица комплетно ќе се реконструира стариот Задружен Дом во нов мултифункционален Центар кој ќе понуди и сместување за туристите
Со изградбата на новиот центар ќе биде уредена и Спомен соба на великанот на македнонскиот пишан збор, Петре М.Андреевски кој во родната Слоештица, меѓу останатите дела ја напиша и популарната Дениција. Во Спомен собата ќе бидат изложени и дел од неговите лични предмети кои ги подари неговото семејство.
Дополнително, во новиот мултифункционален Центар кој опфаќа површина од над 600м2 ќе биде отворена и продавница за локални производи: лековити билки, планински чаеви, печурки, шумски плодови, сувенири и ракотворби автентични за демирхисарскиот крај. Исто така ќе биде адаптирана летна сцена на која ќе се одржуваат настани атрактивни за пошироката публика и домашните туристи
Со проектот „Откривање на скриени атракции“ развиваме интересни патувања, ги мотивираме туристите да ги поминат границите меѓу С.Македонија и Албанија и да ги истражат недопрените места кои нудат уникатни искуства, а притоа да ја доживеат дестинацијата како една. Со реконструкцијата на стариот Задружен Дом, село Слоештица прераснува во микро-дестинација која може да пречека и анимира повеќе од 50 туристи во еден момент.
Локалното население и клубовите за активен туризам се вклучени во нашите проектни активности и заедно со нив ќе креираме туристичка понуда која одговара на светскиот тренд за активни патувања во автентични дестинации кои нудат локални искуства, превкусна здрава храна и недопрена природа – изјави Емилиа Ѓероска, менаџер на проектот.
