На претсвечен настан во Тајланд, неколку натпреварувачки на Мис Универзум демонстративно го напуштија просторот, откако директорот на домаќинот – Miss Universe Тајланд, Науват Ицарагрисил – јавно ја понижи Мис Мексико, Фатима Бош, обвинувајќи ја дека не објавила промотивна содржина на социјалните мрежи.
Настанот, кој беше пренесуван во живо, прерасна во сцена со високи тонови, кога Ицарагрисил ѝ се обрати на Бош пред десетици натпреварувачки и ја нарече „глупава“, според видео снимките што брзо се проширија на интернет. Кога таа возврати дека „има право на свој глас и достоинство“, тој повика обезбедување и ѝ се закани со дисквалификација – не само на неа, туку и на сите кои би ја поддржале.
Во знак на солидарност, повеќето учеснички станаа од местата, а неколку, меѓу кои и актуелната Miss Universe Викторија Кјер Тајлвиг од Данска, ја напуштија салата. „Ова не е начин на кој се однесуваш со жена. Да навредуваш друга натпреварувачка е под секое ниво на почит. Затоа си го земам мантилот и си одам“, изјави Тајлвиг додека ја напушташе сцената.
Бош подоцна изјави за медиумите дека 60-годишниот тајландски официјалец ѝ се обраќал со потценувачки тон и ја нарекол „глупачка“. „Не сум кукла што треба да биде нашминкана, облечена и ставена на сцена. Доаѓам да бидам глас на жените и девојките кои се борат за своите права,“ рече таа.
По бурните реакции на јавноста, Организацијата Miss Universe (MUO) остро го осуди однесувањето на Ицарагрисил, нарекувајќи го „злонамерно и понижувачко“. Претседателот на MUO, Раул Роча, изјави дека таквиот чин „ја заборавил суштината на тоа што значи да си вистински домаќин“ и најави правни чекори. „Miss Universe е платформа за оснажување на жените и нивниот глас – не место за нивно заплашување“, изјави тој.
Ицарагрисил во меѓувреме се извини преку видео-порака, велејќи дека „ако некој се почувствувал навреден или непријатно, се извинува на сите, особено на присутните девојки“. Сепак, скандалот веќе предизвика штета на угледот на натпреварот, кој официјално треба да го одржи финалето на 21 ноември во Бангкок.
Редакција Фронтлајн
