Регулаторна комисија за енергетика и водни услуги ја демантира изјавата на портпаролот на ВМРО-ДПМНЕ, Димче Арсовски за висината на платата на претседателот на РКЕ Марко Бислимоски. Според Регулаторна, изјавата е неточна и лажна.
„Платите се јавно објавени и се далеку пониски од предвидените пет просечни нето плати во секторот согласно законот за енергетика“, се вели во соопштението на РКЕ.
Како што се наведува, ако Арсовски не се извини за изнесените шпекулации, ќе следува приватна тужба, а парите од отштетата ќе бидат донирани.
Портпаролот на ВМРО-ДПМНЕ, на денешната прес-конференцијa праша дали Бислимоски зема нето плата од над 2.000 евра, поточно околу 2.150 евра секој месец или 130.000 денари, односно бруто плата околу 200.000 денари.
