Премиерот на Италија, Џузепе Конте денеска ќе достави нов извештај до Парламентот за епидемиолошката состојба во државата и ќе предложи нови ограничувачки мерки што можат да стапат на сила веднаш.
Според италијанските медиуми, новите мерки предвидуваат „затворање на областите каде инфекцијата е најраспространета и затворање на границите меѓу регионите“.
Германија од денеска воведува драстични мерки со кои Владата сака да го сузбие ширењето на епидемијата.
Мерките ќе бидат на сила до крајот на ноември, а таа одлука, која прилично го ограничува секојдневието, предизвика бурна реакција од граѓаните.
Канцеларката Ангела Меркел нагласи дека Владата е свесна дека бара многу од народот, но дека мора да дејствува веднаш.
– Нашиот здравствен систем денес може да се справи со овој предизвик. Но, ако продолжи со ова темпо, ќе ја достигнеме границата за неколку недели. Затоа се неопходни овие остри мерки, рече Меркел.
Целта е да се намали бројот на нови инфекции до Божик, и притоа економијата да функционира, а училиштата и градинките остануваат отворени.
