Собранието и утре ќе расправа за предлогот Добрила Кацарска да биде избрана за судија на Уставниот суд. Денешната расправа беше прекината нешто пред 18 часот, а претседателот на Собранието го најави продолжението за утре во 12 часот.
Во текот на попладневната расправа, опозицијата побара предлогот Кацарска да биде избрана за уставен судија да биде повлечен. Според опозицијата, таа не е стручна за оваа функција која, како што рекоа, ја добива како награда за послушноста кон власта. Не може, посочи опозицијата, судија кој суди спротивно на Уставот, да го брани Уставот.
Во текот на денешната расправа пратениците од партиите на власт, го бранеа ваквиот предлог забележувајќи дека ВМРО-ДПМНЕ најмалку има право да говори за независно судство затоа што во време на нивното владеење, судството било донесено до најниското можно ниво.
Кацарска треба да дојде на местото на судијата Владимир Стојановски, чиј мандат е истечен. Таа беше предложена за оваа позиција од страна на Судскиот совет на крајот на септември.
