Познатиот српски актер Иван Бекјарев почина на возраст од 74 години, пренесоа српските медиуми.
Тој, минатиот месец, се заразил со корона вирус, а пред десет дена му се влошила состојбата.
Последните недели бил на Инфективната клиника во Белград. Актерот дознал дека е позитивен на Ковид-19 додека снимал филм, поради што го напуштил сетот.
Бекјарев првата улога ја одигра во далечната 1967 година, а играше во повеќе филмови, серии и театарски претстави.
Најпознати серии во кои играше се „Подобар живот“, „Среќни луѓе“, „Отпишани“, „Горки плодови“. Во Македонија е најпознат по улогата на Стевица Курчубиќ од „Подобар живот“.
Бекјарев долги години предаваше на Академијата за уметности во Белград. Во 2007 година беше и кандидат за пратеник.
Родителите на Бекјарев се по потекло од Македонија, а неговиот татко Ѓорѓе заминал во Белград пред Втората светска војна, додека мајка му Радмила, по потекло до Гевгелија, во главниот град на Србија дошла во 1945 година.
