Во продолжение обраќањето на вицепремиерот Николовски ви го пренесуваме во целост:
„Денеска заедно со министерската за труд и социјална политика Шахпаска и со сите присутни од босанската и од македонската делегација, тука во Ротмиље, Босна и Херцеговина, оддаваме почит и чест на ликот и делото на претседателот Борис Трајковски, членовите на кабинетот и на екипажот на авионот, кои на ова место, трагично ги загубија животите.
И по поминати 17 години од смртта на претседателот Трајковски, неговите заложби и вредности за мир, единство, за интегритет, за европска држава, се сѐ уште свежи. Секогаш ќе го паметиме како човек кој имаше визија за успешна Македонија, како човек кој беше умерен реформатор и миротворец.
Секогаш ќе остане запаметен и по неговата клучна улога како предводник на дијалогот за мирно решавање на конфликтот во 2001 година, со кој се стави крај на оружените дејствија и се спречи тенденцијата за граѓанска војна во државата.
Со голема умереност во етничкиот дијалог, расправајќи за поголема вклученост на етничките Албанци, претседателот Трајковски одигра клучна улога во решавањето на конфликтот, како и во процесот на помирување и склучувањето на Охридскиот рамковен договор.
Овие негови лидерски вредности беа од исклучителна важност во еден тежок период во којшто се наоѓаше нашата држава. Неговата визија за европска интеграција, за членство во НАТО, за грижа за граѓаните, единство, мир и стабилност – денес се остварува.
Ги исполнуваме неговите ветувања за стратешките цели на државата. Соединетите Американски Држави се наши стратешки партнери и сојузници. Северна Македонија стана 30-та земја членка на НАТО. Го трасиравме патот и на чекор сме до влез во Европската Унија. Нашата држава е пример во регионот за единство, соживот и мир.
И денеска овде во Мостар, на спомен обележјето, ги продолжуваме неговите заложби и го потврдуваме големото пријателство помеѓу Северна Македонија и Босна и Херцеговина, и ја испраќаме пораката за меѓусебна соработка, меѓуетничка толеранција, за мир спокојство и стабилност.
Северна Македонија, денес е пример за држава којашто има успешна регионална соработка и добрососедски односи. Создаваме едно општество за сите, а владеењето на правото и демократските односи и вредности се нашиот врвен приоритет.
Горди сме што го имавме за претседател на нашата држава, горди сме што придонесе за нашата земја да биде на вистинскиот пат, и што успеавме да ги исполниме неговите ветувања.“
