„Полека но сигурно, вистината излегува на виделина! Повеќе од 6 години се криеше од јавноста резултатот од деталната истрага на УЈП за потеклото на имотот и средствата на моето семејство, со која се утврди дека истите се стекнати на законски начин, од пријавени и оданочени средства!“ – се вели во дописот на поранешната пратеничка од ВМРО-ДПМНЕ до Редакција Фронтлајн, а тоа го сподели на својот профил на социјалните мрежи.
„Цело време ова информација се чуваше како строго доверлива за да може да продолжи политичката пресметка со мене, а СЈО да има оправдување за поведување на неоснована постапка против мене и со тоа да троши огромни суми од буџетот на РМ!“ – тврди, меѓу другото, Бонева.
„Имено, во 2014 год. против мене од страна на УЈП беше покрената и спроведена 6 месечна детална постапка за испитување на имотот и имотната состојба на целото мое семејство. За мене од непознати причини, резултатот од истрагата беше класифициран како СТРОГО ДОВЕРЛИВО, па така согласно член 8 став 2 од Законот за класифицирани информации од 2004, овој документ беше третиран како да е информација чие неовластено откривање би предизвикало исклучително сериозна штета за виталните интереси на Република Македонија. Повеќе од 6 години јавноста не смееше да го знае резултатот од испитувањето на мојот и имотот на моето семејство, иако со години се зборува дека треба да се испита и да се знае потеклото на имотот на политичарите! Согласно член 20 став 2 од Законот за класифицирани информации од 2019, побарав од УЈП документот да биде декласифициран за потребите на мојата одбрана пред судот во врска со неоснованото обвинение на СЈО, по што денес добив одговор дека истиот повеќе не претставува класифицирана информација“ – “ – гласи верзијата на настаните според поранешната пратеничка на ВМРО-ДПМНЕ.
Според Бонева, документот што го добила потврдува дека нејзиниот и имотот на целото нејзино семејство не е стекнат, ниту зголемен како резултат на непријавени и неоданочени приходи и дека потекнуваат од законски стекнати, пријавени и оданочени приходи!
„Овде спаѓаат и приходите и имотот на кои се заснова обвинението на СЈО, а за кои истрагата на УЈП утврди дека се законски, со што дополнително се покажа дека обвинението на СЈО против мене е целосно неосновано! Борбата за вистината и правдата продолжува!“ – заклучува Бонева.
Секако, останува и споменатите институции, односно правосудните инстанции да се произнесат во овој случај. Со цел да бидат застапени сите засегнати страни и во интерес на јавноста, Фронтлајн не ја пропушта можноста да го пренесе и ставот на обвинетата Бонева.
Д. Е.
