На изненадување на многумина, вчера како бранител на Орце Камчев се појави Тони Менкиноски, претседател на правната комисија на ВМРО-ДПМНЕ и еден од блиските соработници на Христијан Мицкоски. Секој има право сам да го одбере својот адвокат, секој адвокат може да одбере дали ќе застапува некој клиент или не, но оваа комбинација фрла ново светло пред се внатре во односите на ВМРО-ДПМНЕ.
Менкиноски е еден од главните преговарачи на ВМРО-ДПМНЕ во работните групи кои преговараа за носењето на Законот за јавно обвинителство, закон кој токму ВМРО-ДПМНЕ преку Менкиноски се обидуваше да го спречи преку апсурдни, честопати и контрадикторни. Некаде пред изборите се појави снимка од разговор меѓу Мицкоски и Зоран Милески Кичеец кој важеше за близок соработник на Камчев, каде на таа средба Мицкоски самиот вели дека се бори Законот за јавно обвинителство да не се донесе со цел да пропаднат предмети на СЈО.
„Инаку, таму не е решена работата да знаете. Затоа што овој закон, ако помине вака како што мислат да помине за јавно обвинителство, тој предмет не е завршен. Напротив. Да знаете. Единствен којшто се бори во моментов сум јас“ вели Мицкоски очигледно мислејќи на предметот „Империја“ каде обвинет е и Камчев. Во истиот разговор, Мицкоски му вели на Кичеец дека Камчев бил тој кој финансиски и помогнал на партијата ВМРО-ДПМНЕ.
Денес претседателот на правната комисија на ВМРО-ДПМНЕ, Менкиновски е адвокат на Камчев во предмет кој не е „Империја“ туку во предметот кој се однесува на купување плацеви на Водно од страна на поранешниот премиер а сега осуден криминалец во бегство, Никола Груевски, каде тој е првоосомничен, а второосомничен Сашо Мијалков. Според истрагата за овој предмет, Груевски дел од донациите за финансирање на партијата ги примал лично и не ги прикажувал во завршните сметки и финансиските извештаи на партијата. На тој начин собрал вкупна сума од околу еден милион и 300 илјади евра, пари со кои во периодот од есента 2012 до есента 2013 година Груевски купува градежно земјиште на Водно, преку фирма која е фирма ќерка на фирма од Белизе а истата е управувана од неговиот кум Новачевски. Со назначувањето на Менкиноски за бранител на Камчев отворено се поставуваат прашањата, дали врвот на ВМРО-ДПМНЕ а особено Мицкоски ова го прават како контра-услуга за помошта на Камчев кон партијата или можеби станува збор за претпазливост на Мицкоски за тоа што се би можел Камчев да каже во текот на истрагата?
Д. Е.
