За годинашното издание на Меѓународниот фестивал на песни и ора „ Д-р.Владимир Полежиноски“ од Кичево, од страна на Министерството за култура, со програмата за 2021 година, беа издвоени 350 илјади денари средства, со кои би се покриле трошоците на фестивалот, на кој традиционално учествуваат и поголем број друштва и од странство.
Но, поради пандемијата не е исклучено фестивалот да се одржи во редуцирана форма и со учество само на домашни фолклорни ансамбли, што би чинело помалку средства од одобрените.
– Бидејќи е повеќе од извесно дека поради се поголемиот наплив на новозаболени од Ковид-19, тешко е да се поверува дека на годинешното 14-то издание на Меѓународниот фолклорен фестивал во Кичево, ќе земат учество фолклорни друштва од странство и за чија организација одобрените 350 илјади денари средства се повеќе од доволни. Ако не се реализираат проектираните планови за учество на ансамбли од странство, дел од средствата ќе ги пренамениме за инвестиции на Центарот за култура кои заедно со одобрените 685 000 денари ќе помогнат за промена на вратите и прозорците, како би се намалила потрошувачката на струја и други енергенси за затоплување на просторот, најави Мазлам Османи директор на Центарот.
Тој појасни дека во склоп на инвестициите на Центарот за култура за тековната година, влегува и набавката на опрема за осветлување на театарската сала, каде не е инвестирано од неговото отворање пред 40 години, и посочи дека новопоставените светла ќе помогнат при изведувањето на драмските претстави.
извор: МИА
