пишува БОРЧЕ БОКИ ТРАЈКОВСКИ
Горда Еврејка од Македонија, не значи дека е во прашање Македонка, за да Македонците паѓаат во бесознание од патриотското чувство на Еврејката. Таа е Еврејка, и се гордее со сопствениот идентитет каде и да е во светот, па и овде во Македонија. Горди Македонци има секаде низ светот, има и такви кои се родени во други држави на различни континенти, млади генерации кои не го зборуваат мајчиниот јазик, македонскиот, а сепак, чувството на корените кои ги прави горди Македонци таму каде се родиле и живеат, егзистираат, никој не може да им го одземе. Дури и да се обидат самите да го сторат тоа, никој не може да им ги избрише идентитетските чувства на нивните предци…
Тоа идентитетско чувство не е вера, не е верска определба која во текот на животот може да се смени. Идентитетското чувство е неизбришливо, тоа е корен од кој израснуваат стебла, широки и високи, и само тој, коренот, ги храни и најмладите ластегарки на идентитетското дрво. Дури и да се скрши некоја гранка, во нејзината срцевина и во кората и лисјата ќе се откријат гените на коренот. Идентитетот не можеш да го смениш, дури и да сакаш. И во античко, и во византиско, и во румелијско и во српско и бугарско сме биле идентитетски свои, наши, Македонци. Што ако не “потурчувале“, ги терале децата да учат во бугарски училишта, во српски училишта, ги менувале презимињата, мислејќи дека ќе ни го откорнат коренот на идентитетот? Никој низ длабоката историја не успеал да го смени тоа идентитетско чувство, најмалку на административен начин. Абе ај. И Христијани се муслиманизирале, и Муслимани се христијанизирале, ама идентитетската припадност никогаш не ја смениле. Затоа што не можеле, дури и да сакале. И Нововерци и Протестанти и Католици и Муслимани и Христијани, и Амери и Канаѓани, и Австралијанци и Норвежани, денес, каде и да се во светот, се горди Македонци заради незибришливоста на корените, на идентитетот.
Кој бара заштита на идентитетот и јазикот? Што ќе постигне тој што бара изгласување на некаква Резолуција во македонскиот Парламент за наводна заштита на идентитетот и јазикот? Само плашливци, несигурни во себе, или во нашиов случај, само манипулатори со најсветите чувства, бараат такво изгласување, и не за да го заштитат идентитетот и јазикот, туку, за да продолжат да роворат со чувствата на обичните и искрени Македонки и Македонци, за да ја држат вековната мантра, во која тие, односно ние Македонците мораме да продолжиме да се гледаме преку нишан, сами себе да се обвинуваме, да се мразиме, и на крај ако треба и да се самоистребиме, за тие да ја продолжат најсрамната традиција меѓу Македонците. Да го пљачкаат сопствениот народ бетер од султанските арачлии, од бугарските административци, од српските колонијалисти, лажно заштитувајќи им го идентитетот и јазикот, кој, ни Горниот може да ни го одземе.
Кој е бре тој што може да тргува со нешто што е нераскинливо и неодвоиво од секој горд Македонец? Од мене, од тебе, од сите кои го носат во себе истото чувство, од сите кои се гранки и ластегарки на високото стебло со длабоки корени? Само коркачи веруваат во тоа дека некој може да тргува со овие чувства, да се пазари, да ги испазари. Само немакедонци, можат да МАФТААТ со Резолуции за заштита на нешто што ни тече во вените, што ни е ДНК и ДНА слика во коските. И навистина, ќе може ли некој да ми објасни, како се губи идентитетот?
Текстот е личен став на Авторот. Сите права се задржани.
