Најдобриот светски тенисер Новак Ѓоковиќ ќе се обиде на Олимписките игри во Токио да го освои златниот медал, а потоа да испише историја и да ја освои титулата на завршниот грен-слем турнир за оваа година Ју-Ес Опен во Њујорк.
Српскиот тенисер во интервју за црногорските медиуми истакна дека во ниту еден момент не се двоумел околу настапот на Игрите во Токио.
– Чувството кога ја претставуваш својата земја на најголемата светска спортска манифестација е незаменливо. Олимписките игри се нешто посебно, изјави Ѓоковиќ.
– Мојата цел во Токио е да освојам медал, се надевам златниот. Не е тајна дека одам по златото и дури потоа ќе размислувам за грен-слем турнирот во Њујорк, додаде Ѓоковиќ.
Срспкито тенисер претходно овој месец триумфираше во Вимблдон и го израмни рекордот на Роџер Федерер и Рафаел Надал од 20 освоени грен-слем турнири во кариерата.
