Половина од населението на Европската унија е целосно вакцинирано против коронавирусот – 223,8 милиони луѓе се целосно вакцинирани што значи дека примиле две дози од вакцината или една доза по прележана болест, според официјалните податоци од земјите.
Од 27 земји -членки на Унијата, 13 го поминаа прагот од 50 проценти целосно вакцинирани. Меѓу тие земји се Шпанија со 58 проценти вакцинирани, Италија со 54 проценти, Франција (53 проценти) и Германија (52 проценти).
Земјите со најголем процент на вакцинирани се Малта (74 проценти) и Белгија (59 проценти). Најниските проценти се забележани во Бугарија (14 отсто) и Романија (25 отсто).
Речиси 60 проценти од граѓаните на ЕУ примија една доза од вакцината, што е 265,9 милиони луѓе.
ЕУ, која продолжува да вакцинира со стабилно темпо, сега ги престигнува САД, бидејќи според податоците од 1 август, 49,7 проценти од населението во таа земја е целосно вакцинирано (во споредба со 49,8 проценти во ЕУ).
Досега, четири вакцини се одобрени во ЕУ – Фајзер/Бионтех,Модерна, Астра Зенека и Џонсон/Џонсон. Покрај овие вакцини, Унгарија и Словачка користат и вакцини што не се одобрени од Европската агенција за лекови (ЕМА) и се произведени во Русија или Кина.
Грција се уште има едно од највисоките нивоа на вакцинација во Европа и нејзината програма за вакцинација е подготвена да понуди трета доза вакцина за најранливите групи од септември, доколку е потребно, изјави министерот за здравство Василис Кикилијас. Министерот посочи дека Грција надмина 100.000 вакцини дневно и истакна дека земјата има едно од највисоките нивоа на вакцинација во Европа, и во однос на првата и втората доза. Тој додаде дека неодамнешниот пад на вакцинацијата е „очекуван“. Во врска со вакцинацијата на децата, Кикилијас рече дека тие не се задолжителни и оцени дека со приближувањето на новата учебна година, нивото на вакцинација кај овие групи ќе се зголеми. Министерот посочи дека програмата за вакцинација е подготвена да обезбеди трета доза вакцина за лица со имунолошки дефицит, ранливи групи и постари лица од септември, доколку стручната комисија даде зелено светло. Претходно, грчките здравствени власти соопштија дека околу половина од населението во земјата е веќе вакцинирано.
Словенечкиот инфектолог Бојана Беовиќ предупреди дека Словенија може да се соочи со епидемиолошка „катастрофа“ наесен, доколку во август не се вакцинираат лицата над 50-годишна возраст против Ковид-19. „Повеќе од една третина од невакцинираните се во таа популација и важно е тие да се заштитат во август, бидејќи во спротивно не чека катастрофа наесен, болниците повторно ќе бидат полни со пациенти со ковид“, предупреди Беовиќ, која ја предводи владината група за вакцинација на населението.
Бројот на дневни инфекции е во пораст, додаде таа и дека ова е очекувано со оглед на доминацијата на повеќезаразната Делта варијанта на вирусот.
„Според проекциите, варијантата делта брзо се шири и ќе зарази голем број луѓе кои имаат услови за тежок тек на болеста, но не се заштитени“, рече Беовиќ.Словенечката Влада ја забрзува кампањата за вакцинација против Ковид-19, така што центрите за имунизација ќе бидат отворени за сите заинтересирани граѓани од 8 до 22 часот.
Конечната одлука, меѓутоа, се уште не е донесена, соопшти шведската Агенција за јавно здравје.
Претседателот на Францускиот совет за стратегија за вакцинација против коронавирус Ален Фишер изјави дека е можно да се постигне колективен имунитет во Франција со 90 отсто вакцинираното население до почетокот на есента.
Фишер за радиото РТЛ изјави дека со сегашниот ритам на вакцинација, можен е колективен имунитет до почетокот на есента и додаде дека треба да се убедат оние кои се уште не се вакцинирани.
Во Франција, околу 53 проценти од населението прими една или двете дози на вакцина против коронавирус.
Фишер, професор по имунологија познат во Франција како „Господин вакцина“, вели дека е можно 90 проценти од населението да бидат вакцинирани доколку се забрза вакцинацијата деца постари од 12 години.
Најмалку седум милиони дози на вакцини против Ковид-19 се даваат неделно во Турција, што ги засилува напорите за вакцинација во земјата во услови на зголемен број случаи, објави Дејли Сабах. Податоците од Министерството за здравство покажуваат дека минатата недела во земјата биле аплицирани 7,2 милиони дози. Бројот на вакцини против коронавирус од почетокот на кампањата за вакцинација во земјата е над 73,5 милиони. Повеќе од 20 милиони луѓе во земјата се уште не се вакцинирани. Во последно време во Турција има околу 20.000 нови случаи на инфекција со Ковид-19 дневно, а бројот на смртни случаи од инфекции со коронавирус е близу 100 дневно.
Според Светската здравствена организација (СЗО), бројот на случаи на коронавирус во европскиот регион надмина 60 милиони од почетокот на пандемијата. Воедно, СЗО потсети дека „патувањата во странство не се без ризик“.
– Крајот на пандемијата е далеку и за жал, има повеќе од 1,2 милиони смртни случаи во европскиот регион досега како резултат на Ковид-19, изјави Дорит Ницан, директорка за итни случаи на СЗО за европскиот регион.
Таа ја истакна важноста земјите да продолжат со заедничките напори за заштита на најранливите граѓани и ризични категории./МИА/.
