Оставката на премиерот Зоран Заев е избрзана и донесена во емотивен момент – овој став го делат многумина негови сопартијци, партнери од коалицијата, но и високи политичари од меѓународната заедница. Повеќето се на став дека на државата и претстојат значајни реформи, кои се изводливи единствено со стабилни институции.
Во период кога државата се уште се справува со ковид пандемијата, како на здравствен, така и на економски план, додека дополнително се заканува и енергетска криза, сопартијците и коалициските партнери на Заев го повикуваат да донесе мудра одлука, со цел државата да не западне и во политичка криза, од која последици би трпело целото општество. Од друга страна, тие потсетуваат дека претстои решавање на недоразбирањата со Бугарија, кои би го откочиле евроинтегративниот процес на земјата преку отпочнување на пристапните преговори. Според нив, политичките опоненти го нудат токму спротивното, бидејќи приврзаниците на Христијан Мицкоски продолжуваат да го негираат Преспанскиот договор, Договорот за добрососедство, Охридскиот рамковен договор, но и ги поткопуваат меѓуетничките тензии на домашен план.
Иницијативата во СДСМ, за Заев сепак да остане на чело на партијата прв ја покрена пратеникот Мартин Костовски. „Јас, Мартин Костовски, претседател на ОО СДСМ Куманово, од денеска поднесувам иницијатива кај сите социјалдемократи во државата за поддршка на претседателот Зоран Заев. Недвосмислена и безрезервна поддршка да остане на лидерската позиција во СДСМ. Искрено и чесно, одговорно и храбро, многу дадовме за овие 5 години за Македонија, за СДСМ“, вели Костовски, кој доби поддршка од партиските функционери и членството. Со намера да ја промени одлуката, настапија и коалициските партнери. Тие и изразија поддршка на Владата потврдувајќи дека парламентарното мнозинство е стабилно и одговорно кон иднината на државата и народот и побараа од него да ја преиспита својата одлука за оставка од премиерската функција, како и од местото лидер на СДСМ. -Никако не смее да даде оставка.
Државата има многу сериозни предизвици. Заев има мандат и не може да се повлече. Имаме владина програма. Имаме сериозни проекти кои сме ги ветиле, кажа претседателот на ДУИ, Али Ахмети. -Не поддржуваме одржување на предвремени парламентарни избори и формирање на ново парламентарно мнозинство, бидејќи на Македонија и е потребна стабилност, се соочуваме со енергетска криза и се уште трае ковид пандемијата, изјави Маја Морачанин од ДОМ пред средбата со Заев. Покрај колаициските партнери, оставката на Заев предизвика и бурни реакции во меѓународната заедница, а најгласни беа соседите потписници на Преспанскиот договор. -Ако има владина промена ова сигурно ќе донесе голем притисок врз Договорот, врз правилното спроведување на Договорот од Преспа што е прашање за нас. Но, сметам дека ќе создаде повеќекратни проблеми за самата Северна Македонија во врска со нејзиниот европски тек, изјави алтернативниот министер за надворешни работи на Грција Милтиадис Варвициотис.
Оставката на Заев не само што е лоша вест за реформските напори коишто тој ги започна во Северна Македонија, туку и лоша вест за иднината на европскиот проект, вели во интервју за партиското гласило на германските социјалдемократи (СПД), Нилс Шмид надворешнополитички гласноговорник на пратеничката група на СПД во Бундестагот, пренесува Дојче веле. -И покрај направените компромиси, во прв ред промената на името на земјата, тој не успеа, не по негова вина, да направи значителен напредок кон процесот на проширување на ЕУ, истакна Шмид. -Оставката на Заев е тежок удар, не само за европската социјалдемократија, туку и севкупно за проширувањето на ЕУ. Не смееме да го потценуваме разочарувањето на младата, европски ориентирана генерација кое го произведува недоволната поддршка за социјалдемократските, реформски ориентирани политичари како Заев, заклучува германскиот политичар.
