Македонија треба да ги почне преговорите со ЕУ во декември, а повеќе земји од Унијата работат со Бугарија со цел ова да се случи, порача вчера холандскиот премиер Марк Руте на својата прва официјална посета на Скопје, при која се сретна со премиерот Зоран Заев и претседателот Стево Пендаровски. Тој рече дека е претпазлив оптимист за можноста во декември Македонија и Албанија да ги почнат пристапните преговори за членство со ЕУ и им порача на граѓаните дека ЕУ не го остава прашањето со Бугарија да виси, туку колективно имаат многу разговори со владата во Софија и се надеваат дека по тамошните избори во недела ќе има придвижување напред, пренесува Слободен печат.
Овие пораки на холандскиот премиер, засега непотврдените информации за силниот интерес на францускиот претседател Емануел Макрон преговорите да почнат до 31 декември, како и изјави на повеќе домашни политичари, деновиве силно ја подгреваат атмосферата дека следниот месец може да се случи историскиот исчекор. Таква изјава вчера даде и лидерот на ДПА Мендух Тачи за „Утрински брифинг“, дека според неговите информации на 15 декември ќе се усвои преговарачката рамка.
Руте: Не ја губете довербата во ЕУ
Премиерот Руте вчера порача дека прашањето меѓу Бугарија и Северна Македонија е билатерално и тоа не треба да ги запира пристапните преговори со ЕУ.
– Цврсто верувам во ова и тоа не е само мое мислење, туку на сите други земји-членки на ЕУ. И, можеби не е видливо за сите, но има многу дискусии со Бугарија, јас лично со претседателот Радев, но и другите колеги од ЕУ, за да осигуриме што е можно поскоро проблемот да се реши. Ако граѓаните на Северна Македонија мислат дека прашањето со Бугарија го оставаме да виси, дека не сме заинтересирани и дека Бугарија може да прави што сака, тоа не е точно. Колективно имаме многу разговори со владата во Бугарија и се надеваме дека по изборите в недела ќе се придвижиме напред – рече тој.
Руте потсети дека Холандија е една од земјите што долго беа против преговорите со ЕУ, но била фер и посочи дека во изминатите неколку години е направен голем напредок.
Тој додаде и дека е случајност тоа што неговата посета се случи на еден ден пред гласањето на довербата на Владата и дека била планирана еден месец претходно.
Макрон пишува писма
Според албанскиот интернет-портал Албаниан пост, претседателот на Франција Емануел Макрон им испратил писма на сите француски амбасадори во земјите од Европската Унија, во кои бара од нив интензивно да работат за отворање на преговорите со Македонија и со Албанија. Според извори од Елисејската палата, Макрон поставил два датума. Првиот датум за решавање на проблемот меѓу Бугарија и Македонија е 14 декември, до кога двете балкански земји треба да постигнат договор за бугарското вето за Македонија, што е пречка за отворање на преговорите и за Албанија. Вториот датум е 31 декември, до кога претседателот на Франција побарал преговорите да почнат за двете земји.
На 14 декември е состанокот на шефовите на земјите од ЕУ. Ако договорот се постигне до овој датум, тогаш Унијата ќе може да го утврди почетокот на преговорите за Тирана и за Скопје. Дотогаш француските амбасадори во ЕУ ги очекува интензивна агенда на состаноци.
Албаниан пост во својата анализа додава дека ова е еден од поконкретните чекори што ги презема една членка на ЕУ за да се отворат преговорите. Главната причина за ова туркање од официјален Париз е фактот што Франција од 1 јануари 2022 го презема претседавањето со Унијата, а според порталот, Париз не сака да преземе стар нерешен проблем. За оваа иницијата Макрон добил одобрение од лидерите на водечките земји во ЕУ, меѓу кои и од германската канцеларка во заминување, Ангела Меркел.
Пендаровски: Бугарија до 14 декември ќе нема влада
Претседателот Пендаровски, пак, е помалку оптимист и очекува дека блокадата ќе остане, особено што смета дека до 14 декември, кога е состанокот на шефовите на државите на ЕУ, во Бугарија нема да се состави политичка влада, што е услов да се тргне ветото.
– Знаеме дека деблокадата кон ЕУ зависи од една држава. Џабе моите разговори со европските лидери. Јас мислам дека сите ние во изминатите месеци велевме – само што не сме почнале. Блокадата од Бугарија е тука. Сега има претседателски и парламентарни избори и според роковите во бугарскиот Устав до 14 декември сигурно ќе нема влада, а големо прашање ќе биде дали ќе има и парламент – рече претседателот Стево Пендаровски во гостување во ТВ21.
Според специјалниот пратеник на Владата во Софија, Владо Бучковски, пак, вклучување на Бугарите во македонскиот Устав во моментов е невозможна мисија, со оглед на комплицираноста на процедурата.
– Ако кој било испрати сигнал дека ние сме подготвени тоа да го направиме, значи дека не е искрен во намерите да се најде решение. Треба да се бараат други решенија, но и да се почитува тоа што тие го праќаат кон нас како забелешка – вели Бучковски.
Извор: Слободен печат
