Политичките партии во земјава се во жестока арена на меѓусебни обвинувања пред претстојните локални избори. Додека јавно се разменуваат тешки зборови, според потпретседателот на ДУИ, Бујар Османи, зад кулисите се случува сосема спротивното.
– Кога го слушам премиерот, поради изборната математика секој ден вели: ДУИ во опозиција, а секој ден ни испраќаат емисари за тоа како по изборите… Затоа што тие ги гледаат анкетите. Последната анкета што ја направи ВМРО-ДПМНЕ, разликата меѓу Алијансата за национална интеграција и ВЛЕН е некаде 3 спрема 1. Тие знаат дека ситуацијата е нестабилна, а самите имаат пад од над 100 илјади гласови и знаат дека за да се создаде стабилна Влада ќе мора да се реконфигурира. Но, ние им кажавме дека нема да дозволиме Владата да стане пазар со албанското претставување, изјави Османи.
Од друга страна, првиот вицепремиер, Изет Меџити, смета дека ДУИ продолжува со „лажна кампања“.
– Тие, бидејќи немаат визија како да се води Чаир, како политичари од салони секогаш се повикуваат на Борел, Лајчак, на пораките што им доаѓаат и не ги кажуваат. Знаете дека и во минатото имало кодирани пораки што само тој ги знае. Продолжуваат со лажни анкети, без да ги објават агенциите, нагласи Меџити.
Во меѓувреме, премиерот Христијан Мицкоски продолжува со риториката дека опозицијата ги има загубено изборите.
– Што и да прават, многу брзо од сега, на 19 октомври, ќе се соочат со изборен пораз, што ќе се потврди во вториот круг. Им сугерирам да се откажат од старите времиња и да бидат конструктивна опозиција, порача премиерот.
Коалициите за првиот изборен круг веќе се дефинирани. ВЛЕН, АНИ, ВМРО ДПМНЕ, но и СДСМ ќе настапат самостојно во првиот круг. Владините коалиции ќе се поддржуваат меѓусебно во одредени општини, додека опозицијата СДСМ и ДУИ можното предизборно сојузништво ќе го разгледаат дури во вториот круг од локалните избори.
Премиерот Христијан Мицкоски по престојните локални избори, кои ќе се одржат на 19. октомври, најави реконструкција на Владата и смени во владејачката ВМРО-ДПМНЕ.
– Веднаш после изборите ќе ги отвориме и вратите од партијата за нови смени и за нови луѓе, и во Владата ќе има реконструкција и подобрување на капацитетите… Тоа не значи дека луѓето кои ќе се заменат биле лоши или немарни, но на Владата секогаш и треба зголемен капацитет, уште посилно темпо за промените кои ги правиме. А, ние се наоѓаме на патот на промените, на патот на градење на промени и за прв пат после долго време, на градење на заеднички успеси кои ќе донесат подобра иднина и шанса каква генерации и генерации млади чекаа, изјави тој.
Дестан Јонузи
