Централниот одбор на СДСМ по три часа заседание во седиштето на партијата одлучил да се бира нов лидер на партијата. Заев, пред членовите на ЦО рекол дека не се повлекува од одлуката за оставките, извести на прес-конференција портпаролката на СДСМ Богданка Кузеска.
Како што истакна Кузеска, Зоран Заев информирал дека парламентарното мнозинство е стабилно и изнесува 61 пратеник со тенденција тоа мнозинство да расте. Заев информирал дека има простор за влез и на Алтернатива, за што во деновите што престојат разговорите со Алтернатива ќе продолжат.
Кузеска нагласи дека одлуката на Зоран Заев е после оставката да остане активен член на СДСМ.
Постапката на внатрепартиски избори за лидер на СДСМ, започнува од утре, а тие ќе се одржат на 12 декември.
Таа рече дека за лидер може да се пријават сите кандидати кои што сакаат и ги исполнуваат условите според сатутот на СДСМ.
Централниот одбор на седницата оценил дека државата и надлежните институции со полн капацитет се справуваат со предизвиците од енергетската криза и ги носат сите одлуки во оваа функција.
Државниот буџет е ликвиден и има средства да се помогне енергетскиот сектор. Во однос на пандемијата фокусот на надлежните е да преземат чекор за дополнително мотивирање и охрабрување што повеќе граѓани да се вакцинираат. Буџетот за 20222 е развоен и обезбедува повеќе пари за инвестиции во клучните сектори, рече Кузеска.
Ј. Ѓорѓиоски
