Тимот на Едуино соопшти дека споредено со минатата година, кога првиот серијал Едуино-вебинари имал околу 18 000 гледачи, второто издание на серијалот, како што велат, достигнал фантастични 30 873, нагласувајќи дека се особено горди на успехот и важноста која оваа кампања ја има во образованието.
Серијалот Едуино вебинари содржи претпознатливи онлајн-ресурси за стекнување вештини во областа на образованието. Оваа година тој главно се фокусираше на стекнување практични вештини и методи при одржување на наставата во живо и на далечина.
Едуино-вебинарите се бесплатни интерактивни неформални настани, каде што учесниците имаа можност да следат предавања на актуелни, иновативни и напредни теми кои одговараат на потребите и предизивиците на наставниците, преку споделување примери од добри пракси и совети.
Проектниот менаџер на Едуино, Милена Игњатова, во име на целиот тим на Едуино и СмартАп – кој го спроведува проектот, изрази задоволство што оваа година ги имаат најгледаните онлајн вебинари.
-Особено сме горди за целосната доверба која ја имаме од Едуино-заедницата, од учесниците како и од трудот и вложеноста на нашиот тим. За вкупно 11 одржани Едуино-вебинари, имаме одлични 4,7 и 4,6 просечни оценки за организациајта, за темите кои ги обработивме, како и за говорниците кои ги имавме на овој серијал, што е речиси максимимот во скалата за оценување. Она што особено го радува тимот е бројката со повеќе од 50 000 прегледи на Едуино-вебинарите и тоа околу 24 000 гледачи и учесници на вебинарите во живо преку зум-платформата и 30 873 прегледи на видета од вебинарите на нашиот јутјуб-канал. Успехот на Едуино-вебинарите за нас не претставуваат само бројки од кои сме презадоволни туку и потстрек да продолжиме заеднички да создаваме подобра иднина, изјави Игњатова.
Перо Сарџоски, координатор на Едуино-вебинарите, посочува дека во концептот особено инсистирале на можноста за меѓусебно споделување на изработените активности.
-Тоа е возможно со нивно прикажување на интерактивна табла која специјално ја креиравме за овој серијал и која понатаму ќе биде достапна за користење, со цел едукаторите да имаат можност меѓусебно да преземат идеи и практики и заемно да се поттикнуваат во работата. Во овој серијал издадовме речиси 8500 сертификати за стекнато и применето знаење и сме навистина премногу горди на нивниот постигнат успех, изјави Сарџоски.
Проектот „Едуино: Колективно подобрување на образованието преку ко-креирање и иновации“ е финансиран од Владата на Обединетото Кралство преку Амбасадата на Велика Британија во Скопје, со поддршка на министерствата за труд и социјална политика и за образование и наука, Бирото за развој на образование и УНИЦЕФ. Проектот го спроведува СмартАп – Лабораторија за социјални иновации.
