Премиерот Ковачевски објави на Фејсбук дека телефонски разговарал со градоначалникот на Битола, Коњановски, за да се информира за состојбата со пожарот во фабриката „Жито Битола“.
„Вечерва телефонски разговарав со градоначалникот на Битола, Тони Коњановски за да се информирам за состојбата со пожарот во фабриката „Жито Битола“. Министерот Спасовски и директорот на ЦУК, Стојанче Ангелов се во постојана комуникација со општината, а екипите на МВР навремено пружија поддршка за локализирање на пожарот. Благовремената и координирана реакција го спречи ширењето на пожарот и предизвикување на поголема штета“, објави премиерот Ковачевски.
Пожарот кој попладнево избувна во старата административна зграда на поренешната фабрика за леб „Жито Битола“, е изгаснат. .
Девет пожарникарски возила со 27 пожарникари успешно се справија со пламените јазици кои во целост ја уништија кровната конструкција во пожарот кој почна во 17.20 часот.
По регистрирањето на пожарот во Битола беа мобилизирани Територијалната противпожарна единица и службени лица на СВР-Битола.
Во пожарот нема повредени лица, а превентивно во текот на ноќта пред опожарениот објект ќе дежураат екипи на Територијалната против пожарна единица и сообраќајна полиција.
Ј. Ѓ.
