Михаил Ренџов
Се враќав дома
По пат од раскопки и чакал
A пo мене се враќаа
Моите Ситни Нешта:
Камчето со кое некогаш ме удрија
Капката крв што ми потече од носот
Плодовите што ноќе ги крадев
Шумата во која
Птицата ми се сокри
(По некоја заборавена песна)
Гревовите што ги правев
Бранејќи се себе
Ангелот што го заборавив
Карајќи се со пријателите
И животот што го испуштив
Зјапнат во којзнае што
И којзнае каде.
Една ноќ
Сите мои Ситни Нешта
Беа дома
Сал мене ме немаше.
Сум се изгубил, велат
Зјапнат во којзнае што
И којзнае каде.
Михаил Ренџов (1936) е македонски поет, прозаист и преведувач од Штип. Член е на ДПМ и добитник на наградата “Браќа Миладиновци” (1982) за книгата “Нерези”.
избор: Тања Кармзова Костиглиола
