Потсетување – Како ВМРО-ДПМНЕ и Никола Груевски сечеа ленти за Ванчо Михајлов

Покрај реакциите на многумина, реагираше и ВМРО-ДПМНЕ, од каде првата реакција беше барање на реципроцитет, односно отворање на клубови за Македонците во Бугарија. Прв кој директно го искоментира ликот и делото на Ванчо Михајлов беше генералниот секретар на партијата, Ѓоргија Сајкоски кој при посета на Ресен, Михајлов го нараче докажан поддржувач на фашизмот и негатор на на македонската нација.

Но, токму ВМРО-ДПМНЕ на чело со претходниот лидер, Никола Груевски го славеше истиот тој Ванчо Михајлов и сечеше црвени ленти на отворање музеи со негови восочни фигури. На крајот на 2014 година, тогашниот премиер Груевски и тогашната министерка за култура, Елизабета Канческа Милевска пресекоа црвена лента на Музејот на дејците на ВМРО од Штип и Штипско во штипско Ново Село. Во овој музеј има и восочна фигура на Ванчо Михајлов, пишува Фокус. На настанот пристустваа и тогашниот градоначалник на Штип, Илчо Захариев и Влатко Ѓорчев.

Тогаш Груевски изјави дека Ново Село е легенда за историјата на Македонија и како ретко кое место во земјава има родено дејци и револуционери кои придонеле за развојот на историјата.

Штипската населба Ново Село има богато историско минато, оттаму почнува развојот на Штип, а тука учителствувал и македонскиот револуционер, Гоце Делчев. Во Ново Село се родени Михајло Апостолски, Тодор Александров и најконтроверзниот, Иван Ванчо Михајлов, наречен и Радко.

Извор: Центар.мк