Во петок, 10 јуни, учесничката на програмата Европски лидери на Фондацијата Обама, Селвије Мустафи, ќе учествува на завршната сесија на Демократскиот самит во Копенхаген со претседателот Барак Обама на тема „Демократско организирање во дигиталната ера“. Селвије Мустафи ќе им се придружи на уште двајца учесници на програмта Европски лидери на Фондацијата Обама на сцената при што ќе разговараат за иновативни пристапи за зајакнување на учеството во демократијата и зајакнување на институциите во ерата на дигитални информации. За да ја следите сесијата во живо, посетете го CopenhagenDemocracySummit.com во 16 часот по средноевропско време, пренесува avaja.org.
Селвије Мустафи е национален грасрут организатор на најголемото ромско движење во Северна Македонија, Аваја и дел од поширокото транснационално движење на Ромите во Европа во улога на тренер (помагајќи им на останатите национални ромски движења низ Европа да ги развијат своите стратегии за организирање на заедницата).
Од неодамна таа е претседател на организацијата Романо Авази чија цел е да ја зајакне и мобилизира ромска заедница со цел заедницата да биде дел од процесот на одлучувањето на локално, регионално и национално ниво. Една од нејзините цели е да зајакне и инспирира други млади луѓе во ромската заедница и со тоа да генерира лидери кои ќе работат за колективниот интерес на ромската заедница.
Повеќе од 60 учесници на програмата „Обама лидери 2020 и 2022“ ќе се сретнат во Копенхаген на состанок организиран од Фондацијата Обама кој ќе се одржи од 9 до 11 јуни. Ова претставува прв собир на двете генерации од програмата во Европа од нејзиното започнување во 2020 година поради КОВИД-19 рестрикциите.
По Самитот за демократија во Копенхаген, во сабота на 11 јуни, Селвије Мустафи од генерацијата Обама Европски лидери 2022 заедно со Дениз Селмани од генерацијата Обама Европски лидери 2020 ќе учествуваат на интерактивна работилница со претседателот Обама каде што ќе се осврнат на предизвиците со кои се соочуваат лидерите во нивните региони и ќе споделат идеи и искуства за напредок кое ќе има големо влијание во развивање и зајакнување на демократските општества.
Дениз Селмани е еден од основачите на Институтот за истражување и анализа на политики – Ромалитико каде ја води програмата за локална демократија. Исто така, Дениз е еден од основачите и движењето АВАЈА која има за цел да го артикулира гласот на ромската заедница во нашата земја. Поле на интерес му се политичките партии, изборните модели, политичката комуникација како и следење на спроведувањето на јавните политики насочени кон инклузија на ромската заедница.
Двајцата претставници на Аваја, со останатите Обама лидери ќе ги претстават нивните визии за регионот и развијат предлог решенија за зајакнување на демократијата.
Програмата за лидери на Фондацијата Обама е дизајнирана дополнително да ги инспирира, да ги поттикне и да ги поврзе новите лидери од Африка, Азија Пацифик и Европа за да придизвикаат и направат позитивни промени во нивните заедници и светот. За да дознаете повеќе за програмата, посетете ја веб страницата obama.org/leaders.
