Во Шпанија, погодена од невообичаен топлотен бран за сезоната, пожарникари се обидуваат да стават под контрола неколку шумски пожари. Ситуацијата е комплицирана од сушата, речиси рекордно високите температури и ветерот, јавува МИА.
Температури од 40 до 42 степени се очекуваат денеска во Сарагоса, во североисточниот дел на земјата, во Навара и во регионот Ла Риоха на север, соопштија синоптичарите. Ова се највисоките температури во последните децении за овој период, пред почетокот на астрономското лето.
Најпогодени од шумските пожари се областа на градот Замора, во близина на границата со Португалија, и Каталонија во источниот дел на земјата. Нема информации за жртви. Регионалната влада на Кастилја и Леон, провинцијата во која се наоѓа Замора, соопшти дека горат речиси 20.000 хектари во Сиера де ла Кулебра. Во Каталонија пожарникарите се обидуваат да го локализираат пожарот во Балдомар, но нивната работа е комплицирана од жештините и силниот јужен ветер. Во Толедо, југозападно од Мадрид, повеќе од 3.000 луѓе беа евакуирани од тематски парк поради шумските пожари кои се приближија до паркот.
