Украинскиот претседател Володимир Зеленски синоќа ја обвини Русија дека води енергетска војна и повика на повеќе единство во Европа.
Деновиве Русија се обидува уште повеќе да го зголеми енергетскиот притисок врз Европа. Испораката на гас преку Северен поток е целосно прекината. Русија сака да го уништи нормалниот живот на секој Европеец – во сите земји на нашиот континент, изјави Зеленскиво својата редовна дневна видео порака со Украинциите.
Целта е, додаде Зеленски, да се ослабат и заплашат земјите во Европа.
Освен тенкови и ракети, Русија ја користи и енергијата како оружје. Оваа зима Русија подготвува „решавачки удар“ во енергетскиот сектор. Само поголема кохезија ќе помогне во борбата против тоа, истакна украинскиот претседател.
Тој нагласи дека „Европејците мора подобро да ги координираат своите контрамерки и да си помагаат повеќе. Покрај тоа, притисокот врз Русија мора да се зголеми за да се ограничат руските приходи од продажбата на нафта и гас“.
Зеленски ја обвини Русија за енергетска војна откако руската енергетска компанија „Газпром“ вчера не ги врати испораките на гас за Германија од Северен поток 1, спротивно на претходните планови. „Газпром“ го оправда својот потег со наводно истекување нафта во компресорската станица „Портоваја“ во близина на Санкт Петербург.
Во видео пораката Зеленски, исто така, ја осуди и повредата на неколку деца на изложбата на оружје во Чернихив. Тој го опиша инцидентот како „неприфатлив“ и вети дека одговорните за оваа небрежност ќе бидат казнети.
