Со поетско-музички перформанс во Народниот театар Штип, утревечер во 20 часот, ќе биде одржано поетско-музичко патешествие насловено „Молитви на моето тело“ креиран според циклусот „Молитви на моето тело“ од збирката „Небиднина“ на Ацо Шопов. Овој мултимедијален настан е во реализација на актерите Рујиш Беговска и Суад Беговски-Сухи а музиката е на Енес Беговски.
„Ацо Шопов е еден од “избраните“ поети/уметници кој на релативно млада возраст (како Гете во “Страдањата на младиот Вертер“, Ибзен во “Пер Гинт“, Бергман во “Седмиот печат“) ќе се обиде преку поетската збирка “Небиднина“ да ја прочита “книгата на животот“, сфаќајќи го поимот небиднина како „Остварување низ неоствареноста“. До ова сознание се доближува постепено, чекор по чекор, песна по песна, се додека не дојде до “конечното доближување, конечното свесно откривање на небиднината“, заклучува авторот на “Небиднина“, во чиј состав влегува циклусот “Молитви на моето тело“. Дванаесет песни – дванаесет молитви.“, појаснува актерот Суд Беговски-Сухи.
Влезот за посетителите на овој настан е слободен.
