Социјалдемократскиот сојуз на Македонија (СДСМ) утрово соопштија дека одлуката на Демократскиот сојуз да премине во опозиција во суштина не менува ништо, владината коалицијата и парламентарно мнозинство се силни и стабилни и успешно ќе може да продолжат да ги носат важните закони во Собранието за реформите во економијата и за европскиот пат на државата.
Во текот на вчерашниот ден беа усвоени Законите за Иницијативата Отворен Балкан и Договорот со ФРОНТЕКС, од интерес на сите граѓани.
Од Бихаќка додаваат дека добро е што Демократскиот сојуз и пратеникот Павле Трајанов и понатаму го поддржуваат европскиот пат на државата. и дека тоа е важно за иднината на нашата земја.
СДСМ и владејачкото мнозинство и понатаму остануваат отворени за соработка и со други партии и пратеници кои се за продолжување на европскиот пат.
Претседателот на Демократски сојуз синоќа соопшти дека неговата партија излегува од власта и ќе делува како опозиција.
„Демократски сојуз нема да ја поддржи реконструкцијата на Владата и нема да биде дел од парламентарното мнозинство“, изјави Трајанов.
Партијата на Трајанов соопшти дека и понатаму ќе иницира и поддржува реформи поврзани со евроинтеграциските процеси, со започнатиот скрининг процес, како и со законите кои се во интерес на граѓаните и на државата.
Претходно и Алтернатива ја напушти владината коалиција и соопшти дека ќе делува како опозиција.
