Викендов во Албена, Бугарија, се одржа Европското првенство во снукер за дисциплината „6 црвени“, на кое Македонија беше претставувана од двократниот државен првак Берат Јашари од Куманово.
Вкупно имаше 105 учесници од 25 земји, па сите беа поделени во квалификациски групи со цел да се добијат „последните 32“ за завршниот дел на турнирот.
Ждрепката сакаше Јашари да го игра со долгогодишниот професионалец од Малта, Алекс Борг, каде и покрај тоа што освои еден фрејм, на крајот загуби со 4:1. Сепак, многу подобро издание прикажа против Бугаринот Димо Ангелов, по што славеше со 4:0 и ја освои својата прва победа на Европските првенства.
– Алекс Борг ја оправда фаворитската улога и беше недостижен плен за нашиот играч. Сепак, ќе остане неодговорно прашањето што ако Берат реализираше една од двете релативно лесни фрејм топки за нашиот шампион во првиот фрејм, што сигурно ќе го сменеше текот на мечот! Фантастичната борба во третиот фрејм и освоениот четврти фрејм не беа доволни за целосен пресврт и доѓање на чекор од елиминационата фаза. Но, впечатокот е дека во поголемиот дел нашиот играч рамноправно се носеше со бившиот професионалец од Малта, што му даде дополнителна жед за прва победа во следниот меч со играчот од Бугарија, Димо Ангелов. И тоа и се случи. Иако брејк потингот не беше на врвно и препознатливо ниво за Јашари, убиствената дефнзивна игра го извади Ангелов од поентирачки ритам, па Јашари стигна до реалативно лесни 4:0. Сепак, останува мотивацијата за следните меѓународни натпреварувања и градење на еден нов победнички менталитет,- изјави Лазар Лазаревски, претседател на снукер федерацијата.
Во финалето се сретнаа двајца Англичани, при што Вејн Броун го совлада Харви Чендлер со 5:3.
Освен учеството на собранието на ЕБСА, македонската делегација во Албена ќе забележи уште еден позитивен момент за својот континуиран развој. Во елитно друштво на меѓународната сцена дебитираа и македонските судии Мартин Петрушевски и Димитар Ивтимов, кои во Албена го „скршија мразот“ судејќи ги своите први два меча на Европското првенство во снукер.
– Од самото собрание вредно е да се издвои номинацијата на Сараево, Босна и Херцеговина, за организатор на следниот континентален собир на снукер аматери во март 2024 година. Секако дека не треба да се заборави да се спомне фантастичната организација и на овогодишниот домаќин на првенство, бугарската снукер федерацијата на чело со преседателот Олег Велинов, која воедно успеа во тек на првенството организираше и егзибициони натпревари на дел од бугарските репрезентативци со еден од најдобрите снукер играчи на сите времиња, и бивш повеќекратен светски шампион Марк Вилијамс. На крај изразувам благодарност до Агенција за млади и спорт и компанијата „Алфа Плам“ за придонесот да бидеме присутни и достоинствено да ја представиме нашата земја меѓу многуте снукер гиганти и на овој континтален собир.
