„Не е точно дека опозицијата не била повикана, од самиот почеток беше повикана. Портпаролот на ВМРО-ДПМНЕ велеше дека нема да учествуваат во работните групи во јануари 2021 година. Бевте повикани на сите средби“ рече пратеникот од СДСМ, Дарко Каевски во дебатата со неговиот колега од ВМРО-ДПМНЕ, Тони Јаревски во „24 анализа“ на ТВ24.
Каевски додаде дека не е фер ВМРО-ДПМНЕ да кажува дека не биле консултирани, прашани и повикани, бидејќи од самиот старт, СДСМ го нуди тоа.
„Секаде каде што власта и опозицијата работеле заедно на ЕУ агендата било успешно. Хрватска е пример, каде што опозицијата и позицијата настапуваа заедно“ рече Каевски.
Пратеникот од СДСМ рече дека дури и денес Владата ја повикува ВМРО-ДПМНЕ и дури го нуди и премиерското столче, за опозициската партија да биде дел од приказната за ЕУ.
„Ние уште пред да се случи францускиот предлог, пред да започне постапката, ги поканивме ВМРО-ДПМНЕ да учествуваат во целиот процес, дали преку работна група или Мицкоски, бидејќи нема доверба во останатите функционери и сам да учествува. Овој процес ќе е подобар ако имаме консензус за овие прашања“ рече Каевски.
„Време е ВМРО-ДПМНЕ да стане сериозна партија и да даде поддршка и да се вклучи во сериозни процеси. Немојте да се водите со дневна политика, бидејќи со такво политиканство државата се уназадува, а не се унапредува“ рече пратеникот.
Тој додаде дека еден ден таквото однесување ќе биде покажувано со прст и ќе се кажува дека било нерацинално и штетело на граѓаните.
„Јавноста и граѓаните ценат и знаат кога користите лаги,измислици и дезинформации за подигнување на стравот кај граѓаните. Сметате дека внесувањето нервоза ќе ви донесе политички поени, но тоа е ситно политиканство“ рече Каевски.
Пратеникот од СДСМ додаде дека високи претставници на ЕУ, високи дипломати, претставници на дипломатскиот кор, како и лидери на држави кажуваат дека билатералните прашања нема да бидат пречка во преговорите со ЕУ.
„Ако сметате дека треба да има дополнителни гаранции, гледаме дека Мицкоски оди во Брисел, нека побара изјави на нотар, изгледа тоа го очекувате“ рече Каевски.
