Израел и Саудиска Арабија се блиску до историски мир, изјави денеска во ОН, израелскиот премиер Бенјамин Нетанјаху, додавајќи дека Палестинците немаат „право на вето“ на израелско-арапските односи.
Потсетувајќи на нормализацијата на односите со трите арапски држави во 2020 година и нарекувајќи ја „почеток на нова ера“, Нетанјаху рече: „Блиску сме до уште еден поспектакуларен исчекор напред, историскиот мир меѓу Израел и Саудиска Арабија“.
Саудискиот престолонаследник Мохамед бин Салман неодамна во интервју за американскиот „Фоу њуз“ изјави дека сунитската монархија и хебрејската држава „секој ден се поблиску“ до нормализацијата на односите.
„Таков мир во голема мера ќе придонесе за ставање крај на арапско-израелскиот конфликт, ќе ги охрабри другите арапски земји да ги нормализираат односите со Израел и ќе ја зголеми можноста за мир со Палестинците. Сепак верувам дека не треба да им дадеме на Палестинците право на вето на новите мировни договори со арапските држави. Палестинците би можеле да имаат голема корист од поширокиот мир. Тие исто така мора да учествуваат во овој процес“, рече Нетанјаху.
