Администрацијата на американскиот претседател Доналд Трамп ја повлече номинацијата на Марк Брновиќ за амбасадор во Србија, наведено е во одлуката објавена на веб-страницата на Комитетот за надворешни работи на Сенатот на САД.
Причините за повлекување на номинацијата на Брновиќ не се наведени.
На крајот на март, Трамп го номинираше Брновиќ, член на Републиканската партија и поранешен државен обвинител на Аризона, за амбасадор во Белград. Иако номинацијата наскоро стигна до Комитетот за надворешни работи на Сенатот, Брновиќ не се појави пред тоа тело кое ги потврдува назначувањата.
САД немаат амбасадор во Белград од јануари оваа година, кога Кристофер Хил ја напушти таа позиција, по враќањето на Трамп во Белата куќа.
Во својата денешна изјава за Курир, Брновиќ наведува дека пред сè сака да му се заблагодари на Трамп за тоа што го номинирал за американски амбасадор во Србија.
„Но, како што процесот се одолговлекуваше, стана јасно дека бирократите на „длабоката држава“ не сакаат никој со политичка, етичка и религиозна позадина како мојата да ја извршува амбасадорската функција во Србија. Кога ќе се земе предвид сè, верувам дека во овој момент најдобриот пат за мене е да бидам близок со моето семејство и пријателите во Аризона и да најдам можности да играм поважна улога на домашниот фронт“, наведе Брновиќ.
