Јеменската милиција Хути во вторникот презеде одговорност за обид за напад врз јужен Израел, велејќи дека лансирала „голема серија“ балистички и крстаречки ракети, како и беспилотни летала кон израелски цели, пренесува Њујорк Тајмс.
Милицијата поддржана од Иран го изврши обидот за напад како одговор на, како што ја нарече, „брутална израелско-американска агресија“ во Газа, рече воениот портпарол на Хутите, Јахја Сареа, на платформата за социјалните медиуми X. Г-дин Сареа рече дека нападот бил третата операција спроведена од Хутите „за поддршка на нашите прогонети браќа во Палестина“ и се закани со дополнителни ракетни и беспилотни напади.
Од Њујорк Тајмс посочуваат дека можат независно да ги потврдат тврдењата на Хутите.
Во вторникот, израелската војска соопшти дека нејзиниот систем за воздушна одбрана пресретнал ракета земја-земја истрелана кон Израел „од областа на Црвеното Море“. Од таму велат дека пресретнале и други „воздушни закани“ во областа, од кои ниту една не навлегла на израелска територија.
Израелската војска не соопшти кој стои зад нападите. Но, висок функционер во американското Министерство за одбрана, кој сакаше да остане анонимен, рече дека израелската војска пресретнала проектили лансирани од Јемен со дострел од околу 1.200 милји.
Јеменски аналитичари велат дека нападот, и покрај тоа што бил спречен, ги покажал зголемените способности на Хутите, милиција поддржана од Иран, која го презеде јеменскиот главен град Сана во 2014 година. По неуспешниот обид на воената коалиција предводена од Саудиска Арабија да го уништи, групата сега владее со поголемиот дел од северен Јемен. Таа, исто така, стана важна рака на иранската таканаречена „Оска на отпорот“, која ги вклучува либанската милиција Хезболах и вооружените групи во Ирак, пренесува Њујорк Тајмс.
Д. Т. / Цивил Медиа
