Јулија Навални, вдовицата на рускиот опозициски лидер Алексеј Навални, повика на протест на денот на изборите против претседателот Владимир Путин, пренесува Би-Би-Си.
Како дел од протестот, таа предложи луѓето да формираат долги редици пред избирачките места на 17 март напладне.
„Треба да го искористиме денот на изборите за да покажеме дека постоиме и нè има многу“, рече таа во видео пораката.
Сопругот на г-ѓа Навални почина ненадејно во руската казнена колонија на 16 февруари. Таа го обвини Путин за неговата смрт. Нејзиниот повик за протест на денот на гласањето е наречен „Пладневен ден против Путин“.
Претседателските избори во Русија – за кои повеќето меѓународни набљудувачи не веруваат дека ќе бидат слободни или фер – ќе се одржат во периодот меѓу 15 и 17 март. Се очекува Путин да го освои петтиот мандат на функцијата.
Г-ѓа Навални подвлече дека појавувањето пред избирачките места во исто време е „многу едноставна и безбедна акција“ која не може да биде забранета од властите, но ќе им овозможи на истомислениците „да видат дека не има многу и дека сме силни “.
Луѓето потоа можат да гласаат за кој било кандидат освен за претседателот Путин, да го поништат гласачкото ливче или да напишат „Навални“ со големи букви, потенцираше г-ѓа Навални.
Идејата за пладневен собир на избирачките места беше изнесена од Навални две недели пред неговата смрт.
Навални – кој продолжи да го одржува присуството на социјалните мрежи од затвор преку пораки објавени од неговите адвокати – напиша на X дека протестот на денот на изборите има шанса да биде вистинска „серуска протестна акција… достапна за секого, секаде. ”
„Милиони ќе можат да учествуваат во него. А десетици милиони ќе бидат сведоци“, напиша Навални.
На самиот Навални му беше забрането да се кандидира на претседателските избори во 2018 година, поради пресудата за проневера која нашироко беше осудена како политички мотивирана.
Тој почина додека служеше долгогодишна затворска казна поради политички мотивирани обвиненија.
Кремљ соопшти дека 47-годишниот умрел од природна смрт, но неговите поддржувачи и многу странски лидери го обвинуваат Путин за неговата судбина.
Г-ѓа Навални се најде во центарот на вниманието на политиката веднаш по објавувањето на смртта на сопругот, и оттогаш се обрати пред Европскиот парламент и разговараше со американскиот претседател Џо Бајден.
Во својата порака на Јутјуб, таа зборуваше дека е охрабрена од големите толпи кои излегоа минатата недела на погребот на нејзиниот сопруг во Москва.
Од минатиот петок, илјадници луѓе продолжија да се појавуваат на гробиштата Борисовское, а гробот на Навални беше потопен од цвеќиња. „Не можам да ви кажам колку ми значеше тоа“, рече г-ѓа Навалнаја.
„Алексеј сонуваше за прекрасна Русија на иднината – а тоа си ти“, додаде таа.
М. П.
