Потпретседателот на СДСМ и пратеник во нивиот парламент Фатмир Битиќи, во објава на Фејсбук, ги демантира шпекулациите што се појавија во одделни медиуми за наводно преминување во ВЛЕН.
„Ги повикувам медиумите како и политичките субјекти да не шпекулираат и да не објавуваат вести од типот на „неофицијално дознава…”. Моето членство во СДСМ и улогата на потпретседател се вкоренети во вредностите кои ги споделувам со огромен дел од моите сопартијци. Како пратеник достојно ќе ги претставувам сите кои гласаа за нашата коалиција, а останувам и сојузник на сите кои се за искрени внатре-партиски реформи. Заедно со моите сопартијци ќе ги донесеме тие промени. Тука сум, не одам никаде, цврсто стојам на патот на социјалдемократијата!“, истакнува Битиќи.
Битиќи претходно денеска во објава на „Фејсбук“ пишува дека влегол во политиката за да направи промена и дека не се откажува.
– Во политиката влегов за да ја направам промената и додека не ја направам, нема откажување, пишува Битиќи во објавата.
Од СДСМ најавуваат дека следната недела највисоките партиски органи ќе одржат состаноци на кои ќе се извршат подготовките за свикување отчетен Конгрес, согласно статусот на партијата.
– Во тек се подготовки за процесите што ќе се случуваат во партијата, согласно статутарните постапки и она што беше јавно соопштено досега, по изборите. Наредната недела се планирани состаноци на раководството на СДСМ и Извршниот одбор за отпочнување на постапката за свикување отчетен Конгрес, согласно Статутот на партијата, брифираат од партијата.
Ј. Ѓ.