Со најновиот сингл „Ghosts“, Јон го издаде и првиот истоименуван студиски албум, со што заокружи една етапа од својата кариера. Албумот содржи песни од почетоците на неговата кариера и претставува своевидно животно патување низ последните 6 години. Секоја песна е слика на неговата душа во посебен период од животот.
Во прилог на објавата Јон одговори на неколку прашања:
Што ја прави твојата музика различна?
– Секој музичар е различен, а тоа не е по избор. Тоа е нешто што го носиме во себе како код кој ја дефинира нашата креативност и нè тера да создаваме уметнички дела кои се единствени. Мојата музика би ја ставил воинди-поп жанр со најголемо влијанија од кантри и блуз. Вообичаено, но не секогаш, придружено со акустична гитара и текстови кои се многу лични за мене.
Зошто твојата музика е посебна за тебе? Што направи таа за тебе?
– Волјата и потребата да создавам своја музика се пројави веднаш штом почнав да учам да свирам гитара и ова го паметам многу вивидно. Не сум сигурен како и зошто ми дојде, но знам дека кога научив некои од основните акорди, се обидов да правам верзии на мелодии кои беа мои. Свирењето музика и нејзиното создавање има многу медитативни квалитети за мене. Но, тоа е и начин да разговарам со светот и да ги споделам моите приказни и мисли.
Кој/што најмногу влијаеше на твојата креативност?
– Она што мислам дека најмногу влијаеше на мојата музика е музиката што ја слушав во автомобил како дете со моето семејство. Како семејство, ние сме големи љубители на музиката, па ако не свири радио станица, тогаш сигурно вртат ЦД-ата на Битлси, Мус, Леонард Коен, U2, Франц Фердинанд и многу други музичари и бендови.
Бидејќи имаш толку многу необјавени песни, може ли да ни кажеш како одлучи кои песни ќе се најдат на твојот прв албум?
– Изборот на песни кои ќе се најдат на мојот прв албум воопшто не беше лесен. Се обидов да ја вклучам и публиката во изборот што се покажа многу продуктивно и тоа ми помогна. Но, на крајот се сведе на тоа кои песни најдобро се вклопуваат во идејата за албумот, како и чувството на создавање на уметност во моментот. Сакав да има тек и музичка приказна. Горд сум на песните и воопшто на албумот. Многу сум возбуден за лансирањето на истиот како пакет од овие парчиња музика.
Која песна би рекол дека најдобро ја опишува твојата душа?
– Мислам дека сите песни ме опишуваат. Тоа сум само јас во различни периоди од мојот живот и кариера. Мислам дека тоа е она што го прави овој албум посебен. Содржи животно патување од 5-6 години. Се надевам дека тоа е нешто што публиката ќе може да го слушне и да го препознае, а тоа и ја зголемува вредноста на албумот.
Кои се твоите идни планови?
– Моите планови се веќе во движење. Го снимам мојот следен албум и се подготвувам за турнеи во Македонија, но и во странство. Едвај чекам преку музика да ги споделам моите животни приказни и искуства со светот.
Yon Idy е уметничкото име на Јон Ајдини, роден во Скопје, во 1995 година. Неговата музика се емитува на радио станици низ светот, како во САД, Велика Британија, Германија, Швајцарија, Грција, Хрватска, Албанија, Косово итн.
До сега има учествувано на Sunny Hill Festival во Приштина, Live at Heart во Шведска, како и на националниот натпревар за Песна на Евровизија, каде ја изведе „Dreams“.
Многумина велат дека помислиле дека слушаат странска песна кога прв пат го слушнале Јон, бидејќи неговиот глас е карактеристичен, пее на англиски, а музката е несекојдневна за нашето поднебје. Веќе има воспоставено соработка со реномирано студио од Бугарија од каде очекуваме три нови песни во скоро време. Воедно, има покани за учество на неколку светски фестивали, па следниов период ќе биде многу ангажиран околу настапи и патувања.
