Против 18-годишен приврзаник на Доналд Трамп е покренато обвинение за закана со мачета од 60 сантиметри на две жени, приврзаници на Камала Харис, во Нептун Бич, Флорида, додека тие воделе кампања пред избирачко место, потврди полицијата.
Кејлеб Џејмс Вилијамс е обвинет за кривично дело напад врз лице над 65 години и за прекршок за прикажување опасно оружје.
Началникот на полицијата Мајкл Кеј Јуниор изјави дека Вилијамс, заедно со седуммина 16 и 17-годишници, во вторникот попладне стигнале до градската библиотека со намера да „протестираат и антагонизираат против ривалската политичка партија“.
Носејќи знамиња со Трамп, тие почнале да викаат на група поддржувачи на Камала Харис, а Вилијамс, според фотографија од сведок, заканувачки мавтал со мачетата, држејќи ја над главата.
Според шерифот Кеј, седумте малолетници во придружбата на Вилијамс најверојатно не извршиле никакво кривично дело, но истрагата е во тек.
Поддржувачите на Камала Харис биле две жени, едната на 71 година, а другата на 54 години.
Вилијамс, кој е регистриран избирач на Републиканската партија, работи во ресторан како возач. Тој е приведен, со кауција одредена од 55.000 долари. Доколку ја плати кауцијата, не смее да се приближи на ниту едно избирачко место поблиску од 300 метри, освен во случај кога гласа сам, но тогаш мора да носи наногица.
Минималната затворска казна за напад на постаро лице во Флорида е три години. Максималната казна е 15 години.
