Одлуката на кралот Чарлс III да го лиши принц Ендру од последните кралски титули ја преобликува не само неговата иднина, туку и положбата на целото семејство Јорк, пишува Би-Би-Си.
Сара Фергусон останува без титулата војвотка
Поранешната сопруга на Ендру, Сара Фергусон (66), сега го губи правото да го користи титуларното име Сара, војвотка од Јорк и повторно ќе биде позната само по своето моминско презиме – Фергусон.
Кралскиот коментатор Ричард Палмер вели дека овој потег „неминовно ќе влијае“ врз нејзиниот јавен имиџ.
„Таа го користеше титуларниот статус дури и во својот профил на социјалните мрежи. Сега ќе изгуби дел од престижот што го имаше,“ рече Палмер.
Фергусон веќе се соочува со сопствена контроверзија – неколку добротворни организации ја отстранија како покровител по обелоденувањето на е-пошта од 2011 година, во која таа го нарекува осудениот сексуален престапник Џефри Епстин свој „врховен пријател“.
Кралската коментаторка Викторија Марфи смета дека токму оваа контроверзија имала „поголем ефект од губењето на титулата“.
„Нејзините бизнис активности и хуманитарни ангажмани најверојатно ќе бидат погодени од реакциите на јавноста поради нејзиниот контакт со Епстин ,“ изјави таа.
Фергусон – „кралска преживеана“
И покрај скандалите, Сара Фергусон останува позната како „мајстор на повторното враќање“. Таа и Ендру, кои се разделија пред повеќе од три децении, сè уште живеат во неговата резиденција во Виндзор.
Пред две години, повторно беше забележана во кралското божиќно семејно собирање во Сандрингам, првпат по децении.
„Таа е вистинска преживеана и мајстор на реинвенцијата,“ изјави кралската авторка Кејти Николс. „Беше повторно прифатена од јавноста, а и покојната кралица Елизабета II ја врати во кругот, како и кралот Чарлс, кој е многу наклонет кон неа.“
Принцезите Беатрис и Јуџинија без промени
Ќерките на парот, принцезите Беатрис (37) и Јуџинија (35), ќе ги задржат своите титули и позиции во линијата на наследство.
Принц Ендру останува осми во редот за тронот, додека Беатрис и Јуџинија се деветта и дванаесетта.
Иако формално се членови на кралското семејство, тие немаат активни кралски должности, и според коментаторите, тоа нема да се промени.
„Не гледам сценарио во кое тие би презеле официјални кралски обврски,“ додава Марфи.
И двете принцези уживаат јавна симпатија и се сметаат за „неизвалкани“ од контроверзиите околу нивните родители.
„Тие се најневините жртви во оваа приказна. Останаа достоинствени во молкот,“ вели Николс.
Упадлив крај за принцот Ендру
Најголемиот удар, сепак, го трпи самиот принц Ендру, кој поради поврзаноста со Епстин го изгуби правото да го користи титуларното име „војвода од Јорк“ и нема повеќе да учествува во официјални кралски настани, вклучително и на божиќните собири во Сандрингам.
„За човек кој секогаш го ценел блескотот на монархијата, ова е длабоко понижување,“ коментира BBC.
Редакција Фронтлајн
