Американскиот државен секретар Марко Рубио синоќа изјави дека и Украина и Европа треба да бидат вклучени во преговорите за ставање крај на војната со Русија, по стравувањата дека САД и Русија ќе водат само билатерални разговори.
„Доколку се започнат вистински преговори, а тие се уште не се започнати, но кога ќе започнат, Украина ќе биде поканета бидејќи тие се оние кои беа нападнати“, изјави Рубио за американската телевизија Си-Би-Ес.
„И Европејците исто така ќе бидат вклучени затоа што воведоа санкции кон Путин и Русија и тие се вклучени во сето ова“, рече Рубио, предупредувајќи дека преговори „се уште нема“.
Американскиот државен секретар во моментов е во Ерусалим, каде што одржа прес-конференција со премиерот Бенјамин Нетанјаху. Оттаму, Рубио патува во Саудиска Арабија за да се сретне со руските претставници, заедно со американскиот специјален пратеник Стив Виткоф и советникот за национална безбедност Мајк Волц.
Рубио во интервјуто не кажа кој ќе биде во руската делегација и кога точно ќе започне средбата.
На преговорите во Саудиска Арабија нема да присуствуваат ниту украински ниту европски претставници.
