Хуманистот Денис Јанкуловски – Космонаутко, се најде на страниците на учебникот „Граѓанска и политичка партиципација“, како пример за човек кој со својот активизам поттикнува и прави општествени промени.
„Епа драги мои, дојде и тој ден. Каква чест, денес Космонаутко влезе и во учебник. Тешко наоѓам збор за да опишам како се чувствувам, ова е награда, ма повеќе од награда. Ејјјј, студенти ќе читаат и ќе ме спомнуваат како пример од Македонија. Па па па, радости невидени. Им благодарам на тимот Професори на чело со Јасмина Трајкоска Наумоска за оваа чест што сум дел дел од нешто што е првенче, што е трајно, едноставно Благодарам. Правете добри дела, волонтирајте, прифатете, почитувајте, вклучувајте. Наградите сами си доаѓаат“, напиша во објава на Фејсбук популарниот Космонаутко.
Во глава 4 од овој учебник, насловена „Граѓанско општество и актери на граѓанското општество, Јанкуловски е посочен како пример за човек кој преку своите заложби постигнува општествени промени кои се во согласност со јавниот интерес.
Автори на овој учебник се проф. д-р Јасмина Трајкоска Наумоска, д-р Јосипа Ризанкоска и д-р Гордан Георгиев. Станува збор за универзитетски учебник во издание на Фондацијата Фридрих Еберт, наменет, пред сè, за студентите на правните и политичките науки. Но, со темите кои ги обработува, може да послужи и на пошироката читателска публика – особено за невладините организации, политичките партии, но и сите граѓани кои сакаат да бидат вклучени во политичкиот живот и да се информираат за својата улога во него.
Студентите од сите факултетети и универзитети можат бесплатно да го преземат учебникот на следниот линк.
Ј. Ѓорѓиоски
