Бродот „Бутринти“ на албанската воена морнарица, кој е дел од мисијата на НАТО во Егејско Море, спасил 32 мигранти од Авганистан, кои биле во гумен чамец и овозможил безбедно да стигнат на копно.
-Албанските вооружени сили продолжуваат да придонесуваат за безбедносните служби и надвор од границите на земјата. Екипажот на бродот „Бутринти “, во зоната на патролирање во утринските часови успеа да спаси мигранти од Авганистан, кои со гумен чамец испловиле од Чешме, со дестинација островот Хиос, објави албанското Министерство за одбрана.
Според министерството во спасувачки акција, само во последните четири дена спасени се вкупно 70 мигранти, од нив 16 деца, со што ја покажала „својата посветеност и подготвеност да обезбеди безбедност и спасување животи во меѓународните води“.
Од 2016 година, кога Албанија стана дел од мисијата на НАТО, во Егејско Море припадниците на албанската морнарица спасиле повеќе од 3.100 илегални мигранти, меѓу нив голем број жени и деца.
