Белата куќа соопшти дека побарала од федералните агенции да назначат главни лидери за вештачка интелигенција и да развијат стратегии за проширување на употребата на вештачката интелигенција во извршната власт, со што ќе се укинат регулативите од мандатот на Бајден кои имаа за цел да воведат заштитни мерки за користење на таа технологија.
– Агенциите мора да усвојат напреден и про-иновациски пристап кој ќе ја искористи оваа технологија и ќе придонесе за обликување на идните владини операции, се наведува во упатствата.
Упатствата отповикуваат две наредби издадени за време на поранешната администрација на претседателот Џо Бајден. Со една од нив од агенциите се бараше да спроведат мерки за заштита на човековите права и да се обезбеди транспарентност, а со другата да се ограничи употребата на вештачката интелигенција.
Претседателот Доналд Трамп веќе ја укина извршната наредба на Бајден од 2023 година, со која се намалува ризикот од вештачката интелигенција, барајќи од програмерите да разменуваат податоци.
Упатствата испратени во понеделникот бараат од агенциите „да развијат стратегија за вештачка интелигенција која ќе ги идентификува и отстрани пречките за одговорно користење на вештачката интелигенција и ќе постигне подобрувања во нејзината примена“ во рок од шест месеци.
Белата куќа соопшти дека повеќе нема да воведува „непотребни бирократски ограничувања за употребата на иновативната американска вештачка интелигенција во извршната власт“.
Втората директива наведува дека Белата куќа сака да спроведе „ефективна имплементација на вештачката интелигенција во Владата“ и дека бара од агенциите да се фокусираат на интероперабилноста.
Агенциите мора да „да ја зголемат употребата на вештачката интелигенција произведена во Америка до најголема можна мера“, се додава.
Белата куќа објави дека со новиот пристап ќе се укине напорниот процес на известување и ќе се оптимизира процесот на аплицирање и ќе продолжи да се штити приватноста.
Многу владини агенции се охрабруваат да користат вештачка интелигенција за да решат голем број прашања. Федералната управа за авијација, на пример, користи машинско учење и моделирање јазик за скенирање извештаи за инциденти и пребарување повеќе извори на податоци за да ги открие ризиците во авијацијата.
