Основното јавно обвинителство Скопје поведе постапка против четири лица кои извршиле вкупно четири, а се обиделе да извршат уште една тешка кражба од објект на ЈП МЖ Инфраструктура – Скопје, на булеварот „Србија“.
-Од почетокот на месецов, во четири наврати, со физичка сила и алат го кршеле катанецот со кој била затворена капијата на објектот, а потоа влегувале внатре и одземале машини и други предмети во вкупна вредност од 1.239.000 денари. Потоа, уште еднаш на 14 април, двајца од нив дошле пред објектот, ја обиле металната капија и се обиделе да одземат парчиња лим, но биле забележани и задржани на самото место од вработените, информира државното обвинителство.
ЈОРСМ во соопштението посочува дека за сите нив јавниот обвинител до судијата на претходна постапка од Основниот кривичен суд Скопје доставил предлог за определување мерка притвор.
