Неделата на циркуларна економија 2025 официјално започнува денеска, 26 мај, и трае до 1 јуни, во сите земји на Западен Балкан. Иницијативата обединува низа активности и настани организирани од партнерите на ЛогЕкс (LogEx) низ целиот регион. Овогодинешната тема е „Од локални решенија до регионално влијание“ (From local fixes to regional impact).
Зелен ЦИВИЛ (Green CIVIL) – организациската единица на ЦИВИЛ – Центар за слобода – ја стартува Неделата на циркуларна економија со медиумски прилози со едукативни текстови и примери за бизнис модели базирани на петте основни принципи на циркуларната економија: Преиспитај, Отфрли, Намали, Повторна употреба и Рециклирај (Rethink, Refuse, Reduce, Reuse, and Recyclе).
Зелен ЦИВИЛ ќе одржи регионална онлајн конференција „Дај петка за подобра иднина!“ (Give me five for a Better Future) во четврток, 29 мај, со почеток во 12 часот, на која ќе учествуваат претставници експерти и граѓански активисти од регионот. Конференцијата ќе се емитува во живо на YouTube и Фејсбук профилите на ЦИВИЛ.
Под слоганот „Дај петка!“ aктивностите на Зелен ЦИВИЛ се фокусираат на јакнење на јавната свест, но и на иницијативи за политички дијалог и видливост на практиките за циркуларна економија. ЦИВИЛ во „Неделата на циркуларна економија“ ќе учествува и со богата медиумска продукција со вклучување на засегнатите страни и презентација на најдобри практики за промовирање на циркуларната економија, со учество на носители на одлуки, експерти, практичари и граѓанското општество.
ЛогЕкс (LogEx) се: The Balkan Forum (Косово), CIVIL / Green CIVIL (Северна Македонија), Build Green Group (Албанија), CENER 21, COD Jajce (Босна и Херцеговина), Universum International College (Косово), Zero Waste Montenegro (Montenegro), YIHR Serbia (Србија).
Преземено: Цивил Медиа
