Дуња Иванова од ВК Енерџи е македонската претставничка на годинешното Европско првенство во МТБ Маратон кое ќе се одржи наредниот викенд во Казела, Италија.
„Патеката со должина од 82км и висинско искачување од 2.600 метри е предизвикот на „UEC – Union Européenne de Cyclisme“ за најдобрите натпреварувачи од сите европски земји кои ќе треба да покажат силна издржливост, вештини и сериозна техничка подготвеност“, известуваат од ВК Енерџи.
Со низа подиуми и високи пласмани на УЦИ маратони низ Европа, Иванова се искачи на 56. место на светската МТБ Маратон ранг-листа, каде се наоѓаат над 500 најдобри велосипедистки од целиот свет.
Овој пласман ѝ овозможи на Иванова да обезбеди норма за настап на Светското првенство во МТБ Маратон, кое ќе се одржи од 30 август до 14 септември во Валис, Швајцарија.
Таа е и државен првак во МТБ Маратон, освојувајќи ја титулата на Националното првенство што се одржа во екстремни услови на планинските патеки во Крушево.
Ј. Ѓ.
