Летовите низ Блискиот Исток се откажани или одложени, а патниците во Ирак, Јордан, Либан, Иран и Дубаи се соочуваат со прекини. Авиокомпаниите денеска ги откажуваат и летовите до и од Израел поради ескалацијата на тензиите на Блискиот Исток по нападите на Израел врз Иран.
Израелската авиокомпанија „Ел Ал“ ги откажа сите свои закажани летови до и од Израел за денес и утре поради безбедносни проблеми и можни ирански контранапади, објави ДПА. „Ел Ал“ соопшти дека ќе им дозволи на патниците со билети за заминувања до 28 јуни да ги откажат и да ги конвертираат во ваучери за патување. Новите резервации за летови закажани до 22 јуни се суспендирани додека не се разјасни ситуацијата.
Летовите што веќе се насочени кон Израел беа пренасочени кон алтернативни аеродроми и сите закажани заминувања беа откажани до понатамошно известување. Аеродромот Бен Гурион во близина на Тел Авив, исто така, на својата веб-страница соопшти дека ги суспендирал сите дојдовни и појдовни летови до понатамошно известување.
Аеродромот Абу Даби во Обединетите Арапски Емирати предупреди на можни прекини, повикувајќи ги патниците да ги контактираат своите авиокомпании. „Етихад Ервејс“ соопшти дека два лета помеѓу Абу Даби и Тел Авив се откажани, а четири други се одложени.
Авиокомпанијата „Емирати“ соопшти дека некои летови се откажани „поради моменталната ситуација“, додека аеродромите во Дубаи потврдија одложувања и откажувања на меѓународниот аеродром во Дубаи и во Дубаи Ворлд Централ поради затворање на воздушниот простор над Иран, Ирак и Сирија.
